چَتُرُ رَهَي نَہ چِتُ، وَيڻَين واڳِيو نَہ رَهَي
رَئِيءَ لَٽِجَي نِتُ، هِيَڙو واٽَ وِرِکَ جِنءَ
سُرُ رِپَ
چَتُرُ = هوش ۾، ريڌل، سجاڳ
چِتُ = دل
وَيڻَين = طعنن، مهڻن، ملامتن سان
واڳِيو = ٻڌل، جڙيل، ڳنڍيل، سلهاڙيل
رَئِيءَ = دز، مٽي، ڌوڙ، لَٽُ
نِتُ = هر هر، وري وري، هر روز
هِيَڙو = هنئڙو، مَنُ، دل
بيت جو پس منظر
~ دل ڪڏهن هوش ۾ نٿي رهي. کيس ماڻهن جي طعنن. مهڻن جي پرواھ ناهي.
~ دل دڳ تي بيٺل وڻ جيان آهي. جنهن تي سدائين ڌوڙ پوندي رهي ٿي.
سمجهاڻي
جيتوڻيڪ هر ماڻهونءَ وٽ علم، عقل، شعور ۽ ڏاهپ موجود آهي ۽ ماڻهون پاڻ تي ٿيندڙ وارتائن تي سوچي، ڪنهن نتيجي تي پهچي ان مسئلي جو حل بہ ڪڍي ٿو. پر سندس اندر ۾ ئي موجود دل تي سندس اختيار ناهي هوندو. دل دماغ جي محتاج ناهي، پنهنجا فيصلا پاڻ ئي ڪندي آهي.
پر ڇو تہ دل سوچي نٿي، غور ۽ فڪر نٿي ڪري. تنهنڪري سندس جذباتي فيصلا اڪثر ماڻهونءَ کي ڳچيءَ ۾ پئجي ٿا وڃن.
چوندا آهن دل بادشاھ آهي ۽ بادشاھ پنهنجي مرضيءَ جا مالڪ ٿيندا آهن. ڀلا بادشاهن جي ڪيل فيصلن کي ڪير ڪيئن ٿو چئيلينج ڪري سگهي؟ دل تہ اُتي وڃي اڙبي آهي جتي سندس ڪو وس ناهي هلي سگهندو. تنهنڪري پنهنجي ڪيل غلط فيصلن جَي ڪري سدائين اداس ۽ غمگين رهندي آهي. تنهن هوندي بہ ماڻهن جي طعنن ۽ مليل مهڻن جي ڪا کيس پرواھ ناهي هوندي.
دل ڪنهن ويران گس تي ان اڪيلي وڻ جيان آهي، جنهن تي هر روز دز ۽ ڌوڙ پوندي رهندي آهي. هي دز ۽ ڌوڙ دراصل دل تي ٿيندڙ وارتائون، جفائون ۽ ڪربناڪيون ئي آهن جيڪي دل تي گهرا گهاوَ ڪري وجهنديون آهن.
چونڊ، تحقيق ۽ تشريح محترم مظفر منگي صاحب جي ٿورن سان سندس فيسبوڪ وال تان ورتل
____
مظفر منگي جو جنم عظيم تاريخي ۽ ثقافتي اهڃاڻ مهين جي دڙي جي ڪک ۾ اڏيل ٻلهڙيجيءَ جي مهڪ واري چيڪي مٽيءَ ۾ ٿيو. سندن والد محترم استاد سان گڏ لطيف شناس، ليکڪ ۽ ڊرامه نويس هيو. پاڻ جڏهن جوان ٿيو ته بيباڪ صحافي، شاعر، اديب، محقق ۽ ڀٽائيءَ جي پارکو مرحوم هدايت منگيءَ جيڪو سندن وڏو ڀاءُ ٿئي سندن تعليم ۽ تربيت ڪئي.
رشيد سمون جنهن جو تعارف هوئن ته سنڌ سلامت آهي پر سنڌي بلاگنگ جي دنيا ۾ نوان ٽيمپليٽ متعارف ڪرائي اهي سنڌين ۾ ورهائي سنڌي ٻولي جي ڪمپيوٽنگ جي دنيا ۾ اڳڀرائي ۽ سهڻي ڏيک ڏيڻ لاءِ ڪوشان ڪرڻ به سندس ئي ڪم آهي