وَرَ ۾ ڪونهي وَرُ، ڏيرَنِ وَرُ وڏو ڪِئو

وَرَ ۾ ڪونهي وَرُ، ڏيرَنِ وَرُ وڏو ڪِئو
نِهارِيندِيَسِ نِڪرِي، بوتَنِ ڪارِڻِ بَرُ
آڏو ٽَڪَرَ ٽَرُ، مَتان روهَه رَتِيُون ٿِيَين

سُرُ دَيسِي سَسُئِي

وَرَ = مڙس، ڀتار، ڪانڌ
وَرُ = ڏنگائي، زبردستي، زورآوري، سازش
بوتَنِ ڪارِڻِ = اٺن لاءِ
بَرُ = پَٽُ، ميدان ،بيابان، رڻ
ٽَڪَرَ = جبل، پهاڙ
روھَ = جبل
ٽَرُ = هٽي وڃ
رَتِيُون = ذريون ذريون

بيت جو پس منظر

~ منهنجي مڙس ۾ ڏنگائي نہ هئي، پر ڏيرن ڌوڪو ڪيو.
~ ڀنڀور مان نڪري اٺن جي قافلي پويان وينديس.
~ اي جبل ! منهنجي آڏو ٽري وڃو نہ تہ ذريون ذريون ٿي ويندئو.

سمجهاڻي

سسئي پنهونءَ پڄاڻان لڙڪ لاڙيندي چئي ٿي :
هي سڄي سازش، زورآوري ۽ زبردستي منهنجي ڏيرن جي آهي نہ تہ پنهون اهڙو ڪونہ هئو. منهنجي هر ڳالھ مڃيندو هو ۽ مون تان سر ساھ صدقو ڪندو هو. هاڻي هتي رهي ڇا ڪنديس، ڀڀنڀور کان موڪلائي پنهل جي اٺن جي قافلي پويان وينديس، لڪ لتاڙيينديس ۽ جبل جهاڳينديس.
سسئي جبلن کي للڪاريندي چئي ٿي :
اي جبل منهنجي راھ جي رنڊڪ نہ بڻجو، منهنجي آڏو نہ اچو نہ تہ ذريون ذريون ٿي ويندئو.
ڀٽائي اسان کي سيکاري ٿو تہ محبوبَ ۽ منزلون تلاشيندي آڏو ڪيڏيون بہ رڪاوٽون اچن، تن کي ٽوڙي جدوجهد ۽ جاکوڙ جاري رکو.

چونڊ، تحقيق ۽ تشريح محترم مظفر منگي صاحب جي ٿورن سان سندس فيسبوڪ وال تان ورتل
____

"ليکڪ" بابت

رشيد سمون مشهور سنڌي فورم سنڌ سلامت جو باني ۽ منتظمِ اعليٰ آهي. پان هر وقت سنڌي ٻولي سنڌي ٻولي کي انٽرنيٽ تي عام ڪرڻ جي جستجو ۾ رهي ٿو..